Alla Itolae Nusa 1

Kena menaije, kena Alla Itolae lanite kai tapele,

nusa meije selue ono saka sasaisa mosa, kai pusulu rue mise loko esi lakwai mosa. Meite elake penu pusue yelu kai kpetu kurule elake. Po Alla eni kbasare ekbasa ndete kwele babaije.

Alla Iombe, “Hitate etola.” Eleki hitate elake etola.

Alla Iselu be hitate mere mise, eleki Itebi hitate bei melene.

Iono hitate mere esi nane kpita kai melene esi nane kpetu. Kpeture lia eleki beleti. Mere petu menaije.

Eleki Alla Iombe, “Cakrawalare etola leke elarake kwele mere kena lua, kai urue kena otoi lua rebe tebike bei lomai.”

Eleki eono ele mere. Mere Alla Itolae cakrawala rebe elarake kwele kena esi lebuije kai esi babaije.

Eleki Iono cakrawala mere esi nane lanite. Kpeture lia eleki beleti. Mere kena petua luare.

Eleki Alla Iombe, “Kwele rebe mpe lanite esi lebuije suke urala loko otoi esa, leke supu selu tapele.” Eleki eono ele mere.

Alla Iono tapele mere esi nane kmalane, kai kwele rebe ulupu kena otoi esa mere esi nane meite. Alla Iselu mere laleIje ndina.

Eleki Alla Ibeteke leneka be, “Suke tapele esirie tnanela. Tnanela rebe esi inai, kai rebe esi buai.” Eleki eono ele mere.

Mere Alla Iono tapele esirie pusue tnanelaru. Alla Iselu mere laleIje ndina. Kpeture lia eleki beleti.

Mere kena petua telure.

Eleki Alla Iombe, “Suke yelu sesi rebe uhita, undete lanite leke uhita nusa meije, utebi kpitare bei kpeture kai leke utiluke kpitare esi menaije, musune kai petu elakaru.” Eleki eono ele mere.

[tolong lihat ayat sebelumnya]

Hoko Alla Itolae yelu hitata lua elaka; yelu meru lematai leke ehita kena kpita kai bulane leke ehita kena kpetu. Kai Itolae kmalea lekwe.

Alla Itolae yelu rebe uhita mere ndete lanite, leke uhita nusare,

leke uhita kpita kai kpetu, utebi hitate bei melene. Kai Alla Iselu mere laleIje ndina.

Kpeture lia eleki beleti. Mere kena petua atare.

Eleki Alla Iombe, “Mpe kwelere suke yelu kwanala ooani bokala urue kenae, kai ndete teture manua bokala uribu.”

Mere Alla Itolae binatana rebe uela titinai ndau meite, kai pusue yelu kwanala rebe urue mpe kwelere, kai pusue manua ooani. Alla Iselu mere laleIje ndina.

Alla Iriluke misete ete pusue yelu meru hoko Ipletae yelu rebe urue kena kwelere leke utapa boka kai upenue meite, kai Ipletae manuaru leke utapa boka.

Kpeture lia eleki beleti. Mere kena petua limare.

Eleki Alla Iombe, “Suke tapele esirie binatane ooani bokala rebe urue nda kmalane, rebe mauna kai klalana, elaka kai tona.” Eleki eono ele mere.

Alla Itolae pusue yelu meru ele mere. Kai Iselu mere laleije ndina.

Eleki Alla Iombe, “Kena meije Ite tolae tamata rebe esi sakesa kai ite kai selusi saka ite. Leke esi kbasae pusue ianaru, manuaru, kai pusue binatana maketaru, rebe mauna kai klalanaru, rebe elaka kai tonaru.”

Hoko Alla Itolae tamatare ele mere. Iono esi sakesa kai ruaIje neka. Itolae tamatare mokai kai bina.

Eleki Iriluke misete etesi hoko Iombe, “Imi biti kwetela kai imi anubua boka, leke esi penue nusa meije kai esi kbasaele. Au ulake imi kena kbasae ianaru, manuaru, kai pusue binatana maketa rebe klalanaru.

Au riluke tnanela oani bokala rebe esi inaiju kai rebe esi buaiju ete imi kena imi manane.

Po ete manuaru kai binatane klalana maketaru, Au riluke tapoane kai tnanela rebe esi loine kena esi manane.” Hoko eono ele mere.

Alla Iselu pusue yelu rebe Itolaelu meru hoko laleIje ndina. Kpeture lia eleki beleti. Mere kena petua nere.